Të shtëna në Tiranë/ Qëllohet ndaj një makine, objektiv biznesmeni i njohur (EMRI)

Të shtëna me armë zjarri kanë ndodhur mesditën e sotme te nënkalimi i Liqenit të Thatë në Tiranë.

Mësohet se objektiv i atentatit ishte administratori i shkollës private “Wilson”, biznesmeni Lulëzim Masha, 63 vjeç.

Ky i fundit po udhëtonte me makinën e tij tip “Benz”, kur një person ende i paidentifikuar ka hapur zjarr ndaj automjetit.

Fatmirësisht, 63-vjeçari nuk është lënduar, ndërkohë autori është larguar nga vendngjarja.

Policia ka ngritur pika kontrolli në zonë për identifikimin dhe kapjen e autorëve. Deri më tani nuk dihen ende detaje lidhur me motivet e atentatit.

NJOFTIMI ZYRTAR I POLICISE

Më datë 18.01.2022, te nënkalimi te Liqeni i Thatë, nga një person ende i paidentifikuar, dyshohet se është qëlluar me armë zjarri në drejtim të mjetit me drejtues shtetasin L. M., 63 vjeç.

Si pasojë e të shtënave, nuk ka persona të lënduar.

Shërbimet e Policisë kanë shkuar menjëherë në vendngjarje, janë ngritur pika kontrolli në të gjitha pikat hyrëse-dalëse të Tiranës me qëllim kapjen e autorit.

Ndërkohë, grupi hetimor ndodhet në vendngjarje dhe është duke sekuestruar çdo provë të mundshme materiale që do të shërbejë për identifikimin e autorit të ngjarjes.