Sharroi hekurat e qelisë dhe zbriti me çarçafë, Italia vijon kërkimet për kapjen e tij

Autoritetet italiane po vijojnë më tej me kërkimet për të gjetur shqiptarin që u arratis natën e ndërrimit të viteve nga burgu i Vercelli.

Mediat në Itali shkruajnë se sipas sekretarit të Përgjithshëm të Sindikatës së Policisë së Burgjeve të Sapës, Donato Capece, arratisja e Kristjan Mëhillit ishte paralajmëruar.

‘Prej disa kohësh siguria e brendshme e burgjeve është asgjësuar nga masa, si survejimi dinamik dhe regjimi i hapur, largimi i rojeve të Policisë së Burgjeve nga muret e burgut, mungesa e stafit të policëve të burgjeve, mungesa e të cilëve bëri që të ndodhte kjo arratisje’– u shpreh ai, shkruan Fan Page.

I riu ka sharruar hekurat e qelisë si dhe ka zbritur me çarçafë nga kati i katërt i burgut  natën kur vëmendja e gardianëve ka qenë tek festa e Vitit të Ri.

Ajo që bie në sy në raportimet e mediave italiane është fakti se e konsiderojnë shqiptarin si “të rrezikshëm dhe pa skrupuj”.   Mëhilli duhet që të vuante dënimin në burgun e Vercelli deri në vitin 2029.