Kryeministri Edi Rama ka deklaruar se Partia Socialiste do të marrë pjesë në zgjedhjet e pjesshme vendore që presidenti Ilir Meta dekretoi për datën 6 mars.
Ai shtoi se në këtë garë kandidatët nuk do vinë nga rradhët e deputetëve, pasi sipas tij, këta të fundit janë zgjedhur për të ushtruar funksionet në Kuvend.
Ky vendim për kryeministrin u mbështet edhe nga Kryesia e PS-së, ndërkohë që ka shtuar se përparësi për të kanë kandidatet femra.
“Sa i takon vendimit për të bërë zgjedhjet në 6 bashki kemi folur për të nisur menjëherë organizimin, është proces ku ne sigurisht do jemi pjesë do respektojmë afatet do paraqesim kandidatët. Nuk mendoj se do kemi deputetë në parim në këtë garë se deputetët janë zgjedhur për të bërë deputetin e ky është mendimi i gjithë kryesisë! Sa për kandidimin e grave, mes një burri me një grua, zgjedh një grua”, tha Rama.
