Detaje nga vrasja në Lezhë/ Autori vetëm 17 vjeç, mori hak për babain

Dalin detaje të reja nga vrasja në fshatin Manati, pak kilometra larg Lezhës.

Mësohet se viktimë ka mbetur Lekë Lekëgjonaj, 65 vjeç.

Autori është identifikuar si 17-vjeçari Florian Përvathi, i cili u vetëdorëzua në polici pak minuta pas krimit.

Motivi i ekzekutimit është gjakmarrja.

Babai i Florian Përvathi është vrarë rreth 10 vite më parë pas një konflikti me vëllain e viktimës së sotme, Ndue Lekëgjonaj.

NJOFTIMI ZYRTAR I POLICISE

Policia e Lezhës neutralizon dhe vë në pranga në kohë rekord, një 17-vjeçar që kreu vrasjen e 65-vjeçarit, para pak minutash, në fshatin Manati të Lezhës.

Sekuestrohet dhe arma e krimit.

Shërbimet e DVP Lezhë dhe të Komisariatit të Policisë Lezhë, menjëherë pas marrjes së njoftimit se në fshatin Manati kishte të shtëna me armë zjarri, kanë shkuar menjëherë në vendin e ngjarjes.

Falë reagimit profesional e të menjëhershëm është bërë i mundur neutralizimi dhe kapja e 17-vjecarit F. P.

17-vjeçari, rreth orës 12:00, në rrethana ende të paqarta dyshohet se vrau me armë zjarri shtetasin L. L., 65 vjeç, banues në Manati, dyshohet për motive hakmarrjeje.

Shërbimet e Policisë kanë sekuestruar dhe armën zjarrit pistoletë me të cilën dyshohet se 17-vjeçari kreu krimin.

Grupi hetimor ndodhet në vendngjarje dhe vijon punën për sqarimin e rrethanave të ngjarjes.