Policia në Spanjë ka arrestuar dy shqiptarë pasi dyhsohen se janë autorë të një vrasje që ka ndodhur dy vite më parë në qytetin e Volfsburgut në Gjermani. Të arrestuarit janë Orgest Kurteshi dhe Eglis Veraj, që pritet të ekstradohen drejt Gjermanisë.
Kurteshi, 33 vjeç dhe Eglis Veraj, 27 vjeç, akuzohen për një vrasje të ndodhur në gusht 2019.
Në 13 gusht të vitit 2019, në Vorsfelde të Volfsburgut, një 20-vjeçar u gjet i plagosur në rrugë. Ai humbi jetën në spital. Një tjetër 31-vjeçar i plagosur arriti të mbijetonte. Të dy burrat ishin të mbuluar në gjak dhe kishin marrë plagë të rënda të shkaktuara nga armë zjarri.
Për të mundësuar kapjen e autorëve nisi operacioni “Tattoo”, ku u angazhua një skuadër prej 25 anëtarësh. Operacionit i është vendosur emri “Tattoo”, pasi pak kohë para se të vriteshin, dy të rinjtë sapo kishin dalë nga një studio tatuazhi.
Ende nuk dihet se cila është arsyeja që ka shkaktuar atentatin ndaj të rinjve, mirëpo nuk përjashtohet pista e prishjes së pazareve të drogës.
