Qindra njerëz duke vajtur u mblodhën në një varrezë fshati në Maqedoninë e Veriut në një shi të ftohtë të premten për të varrosur 10 banorë vendas, përfshirë tetë nxënës të shkollës, të cilët ishin midis 45 personave të vrarë në një aksident autobusi në Bullgari.
Autobusi, që transportonte turistë në Maqedoninë e Veriut pas një udhëtimi fundjavë në Stamboll, mori flakë në një autostradë në orët e para të 23 nëntorit. Të gjitha viktimat janë identifikuar si shqiptarë etnikë nga Maqedonia e Veriut. Gabimi njerëzor ishte ndoshta shkaku kryesor i aksidentit, thanë hetuesit bullgarë.
Arkivolët e gjelbër me 10 viktima u ulën në tokë në varrezat e fshatit Morane – të katër fëmijët e Enver Jahit, gruaja e tij, kunata e tij me dy fëmijët e saj dhe dy fëmijët e njërës prej motrave të Jahit – të gjithë nga Morane. Arlinda Vlashi, mësuesja e 11-vjeçarit Omer Jahi, i cili u varros pranë tre vëllezërve e motrave të tij dhe nënës së tyre, erdhi për të nderuar. “Si mund të shkoj në klasë tani kur nuk e shoh atë?” tha ajo me lot.
“Unë isha mësuesja e re e Omerit kur ai filloi klasën e gjashtë në shtator. Ai ishte një djalë shumë i mirë, shumë i mençur, shumë i sjellshëm dhe përvetësonte shpejt.”
Enver Jahi, i cili nuk shkoi në udhëtim për në Stamboll, sepse duhej të drejtonte restorantin e familjes, qëndronte duke qarë në shi, ndërsa varroseshin arkivolet, pasuar nga lutjet e hoxhës.
“Ky ishte një lajm shumë i keq për ne. Jo vetëm për mua por për të gjithë fshatin”, tha Nuredin Bajrami, një fqinj i familjes Jahi. “Ne i njihnim shumë mirë, kishin edhe një restorant dhe njerëzit i vizitonin shumë shpesh. Ata ishin njerëz shumë të mirë.”/Reuters/.
