LIGJET E BIZNESIT
Një organizatë kriminale e drejtuar nga trafikantë shqiptarë është shkatërruar nga policia në Spanjë. Mediat e huaja raportojnë se banda kultivonte, shiste dhe eksportonte lëndë narkotike në Spanjë dhe në vendet evropiane, si në Belgjikë dhe Gjermaninë.
Sikurse raportojnë mediat spanjolle, gjatë operacionit janë arrestuar në total 33 persona, shumica prej tyre shqiptarë.
Nga 33 të arrestuarit mësohet se 21 prej tyre janë në burg, ndërsa për të tjerët janë dhënë masa të tjera sigurie.
Dymbëdhjetë plantacionet që ka zbuluar policia, ishin menduar në vende ku aksesi ishte shumë i vështirë, thanë autoritetet policore spanjolle.
Struktura hierarkike e organizatës kriminale, ata që merrnin vendimet dhe drejtonin grupin, ishin shqiptarë, ndërsa poshtë tyre vinin në radhë spanjollët, kolumbianët, italianët apo gjermanët.
Në pranga mësohet se kanë rënë edhe tre gra, që ishin të angazhuara me marrjen e shtëpive me qira ose sigurimin e automjeteve, me të cilat kryhej transporti.
Kjo organizatë kriminale mësohet se përdorte teknika paramilitre, dedikuar kultivimit, shitjes dhe eksportit të marijuanës që më pas e shisnin në disa provinca spanjolle, në Belgjikë dhe Gjermani.
“Organizata kishte një strukturë shumë hierarkike, duke përdorur teknika paramilitare për të arritur të qëndronin të fshehur në pyllin e izoluar që kishin krijuar dhe për të qenë në gjendje të mbijetonin në rrethana të pafavorshme për disa muaj pothuajse pa asnjë furnizim, përveç atyre që siguroheshin në mënyrë sporadike nga anëtarët e tjerë të bandës”.
Agjentët e Gardës Civile verifikuan se anëtarët e bandës, me stërvitje paramilitare, “dolën në mal për javë të tëra” për të ruajtur plantacionet duke duruar të ftohtin, shiun apo borën dhe qëndronin në këto kampe të tipit gueril duke u kujdesur për tokën, bimët dhe objektet që përdornin për kultivimin e drogës.
“Organizata kriminale ishte e aftë të rriste dhe përpunonte për shitje më shumë se 50,000 bimë narkotike në vit“, thanë autoritetet vendase policore.
