Paditet Facebook, Komuniteti Mysliman: Duam 150 miliardë dollarë

Refugjatët e komunitetit Rohingia të Birmanisë kërkojnë nga Facebook 150 miliardë dollarë kompensim.

Dhjetëra përfaqësues të komunitetit në Shtetet e Bashkuara dhe Britaninë e Madhe nënshkruan padinë kundër gjigantit të medias sociale, ku e akuzojnë se lejoi gjuhën e urrejtjes ndaj tyre, që të përdoret nëpër postime dhe komente të ndryshme.

Në padi shkruhet se algoritmet e këtij rrjeti social, shumëfishuan pa asnjë kufizim, gjuhën e urrejtjes ndaj Rohingave.

Platforma më e madhe sociale në botë akuzohet se nuk investoi për shtim të stafit të kontrollorëve që njohin situatën politike në Birmani dhe se dështoi në fshirjen e postimeve që nxisnin urrejtje.

Facebook ende nuk ka komentuar mbi këto akuza.