Vijojnë kontrollet nga ana e policisë për arrestimin e Stela Gugalljas dhe Klodian Zotos.
Të dy ata janë shpallur në kërkim në lidhje me dosjen e inceneratorit në Elbasan.
Sipas informacioneve janë ushtruar kontrolle dhe në dy hotele luksoze ku mendohet se mund të kenë qenë strehuar por ende nuk është arritur arrestimi i administratorëve të dy kompanive.
Ndërkohë nesër në Gjykatën Speciale pritet të jepet rivlerësimi i masës së sigurisë për ish ministrin e Mjedisit Lefter Koka tashmë i arrestuar dhe dy personat e shpallur në kërkim.
“Është bërë verifikimi i sistemit TIMS dhe ka rezultuar se ata kanë dalë dhe hyrë në Shqipëri. Ndërkohë është duke përfunduar procedimi lidhur me inceneratorët e Tiranës dhe të Fierit, dosje të denoncuara nga opozita. Ka dhe persona të tjerë të nivelit të lartë që pritet të arrestohen” informon gazetarja e Ora Neës, Keti Banushi
Stela Gugallja që është pronarja e kompanisë Albtek Energy si dhe Klodian Zoto që është pronar i kompanisë “Integrated Technology Services” akuzohen për korrupsion të zyrtarëve të lartë dhe të pastrimit të parave.
Ndërkohë incineratori i Elbasanit u shpall i sekuestruar.
