Dy ekzekutimet në Elbasan/ SPAK mbyll hetimet, merren të pandehur 3 persona (EMRAT)

SPAK  mbyll hetimet për dy vrasje që kanë ndodhur në Elbasan, atë të Emiljano Ramazanit dhe Regis Runajt.

Për dy ngjarjet e rënda që tronditën opinionin publik, janë marrë të pandehur 3 persona: Erion Alibeaj, Xhuliano Hoxha dhe Euglen Halili.

NJOFTIMI I SPAK

SPAK ka përcjellë në GJKKO kërkesën për kalimin për gjykim të të pandehurit Erion Alibej, (Andrea Dylgjeri), i akuzuar se në grup të strukturuar kriminal me të proceduarit Xhulian Hoxha e Euglen Halili dhe përmes pjesëmarrjes në grup të strukturuar kriminal ka kryer krimet:

“Vrasja me paramendim” në dëm të viktimës Emiljano Ramazani më datë 20 korrik 2020 në lagjen “28 Nëntori”, Elbasan.

“Vrasja me paramendim” në dëm të viktimës Regis Runaj më datë 29 korrik 2020 në lagjen “Emin Matraxhiu”, Elbasan.

Ndërkohë ndaj personave nën hetim Albert Manahasa dhe Seit Manahasa është kërkuar pushimi i çështjes për shkak se nuk e kanë kryer veprën penale për të cilën janë dyshuar.

Kush është Erion Alibej 

Erion Alibej nuk është një emër i panjohur për drejtësinë shqiptare. Alibej është vëllai i Endrit Alibejt, i cili u ekzekutua në një atentat mafioz në dhjetor të vitit 2018.

Erion Alibej dyshohet se ka gisht edhe vrasjen e Bujar Çelës, vëllait të Talo Çelës i ekzekutuar në Bradashesh.

Erion (Andrea) Alibej (Dylgjeri), rezulton i përfshirë në trafikun e kokainës në Itali.

Ai është arrestuar bashkë me vëllain e tij të ndjerë në vitin 2013 në Itali, në kuadër të një operacioni antidroge, konkretisht në fushën e kokainës.