Deputeti: Rama mbuloi shtatoren e Adem Jasharit që mos ta shohë Vuçiç

Deputeti i Partisë Demokratike, Luçiano Boçi u shpreh se shtatorja e Adem Jasharit në restorantin në Elbasan ku po mbahet edhe darka zyrtare me udhëheqësit e nismës së Ballkanit të Hapur është mbuluar për të mos e parë presidenti Vuçiç.

“Tani sa po më njoftojnë se shtatorja e Adem Jasharit në Elbasan është mbuluar për të mos e parë Aleksandër Vuçiç”, tha Boçi në emisionin “Politiko”.

Sipas Boçit, informacioni duhet verifikuar, ndërsa deputeti tjetër, Arbi Agalliu tha se nëse kjo është e vërtetë është skandaloze.

Në darkën zyrtare ndodhen Kryeministri Edi Rama, Presidenti serb, Aleksandër Vuçiç dhe Kryeministri i Maqedonisë së Veriut, Zoran Zaev. Në këtë darkë merr pjesë po ashtu edhe Alex Soros.

Darka zyrtare i paraprin samitit për Ballkanin e Hapur, ku nesër priten të nënshkruhen pesë marrëveshje.