Vrasja e ish-policit në Laç, pista kryesore e hetimit konfliktet e të birit

Të tjera detaje kanë dalë në dritë nga vrasja e 61-vjeçarit Xhelal Reçi e cila ndodhi një ditë më parë në Laç. Mësohet se pista kryesore mbi të cilën po heton policia është ajo e konfliktit të të birit, Besnik Reçi, kundrejt të cilit një vit më parë, u shënua një atentat nga persona të armatosur, në rrugën Lezhë-Shkodër, por që fatmirësisht, arriti të mbijetonte.

Besnik Reçi, dyshohet se ka qenë i implikuar në shumë ngjarje në qytetin e Laçit. Në lidhje me atentatin që iu bë babait të tij, Xhelalit, policia ka shoqëruar deri më tani 25 persona, por pa rënë konkretisht në gjurmët e autorëve. Pas kryerjes së vrasjes, dyshohet se autorët dogjën makinën që u përdor për krimin, një mjet tip “Toytota” me targa të huaja, në afërsi të lumit.