Testohen 50 efektivët e parë për dro gë, grupet zgjidhen në mënyrë të papritur

Rreth 50 efektivë nga Drejtoria Vendore e Policisë Shkodër i janë nënshtruar testit të drogës. Ata tashmë ndodhen në pritje që brenda pak orësh të marrin edhe përgjigjet nga një laborator privat me të cilin ka bashkëpunuar Drejtoria e Përgjithshme e Policisë.

Ky zhvillim vjen dy ditë pas marrjes së vendimit nga Drejtori Gledis Nano dhe nënshkrimit të marrëveshjes me ‘Intermedica shpk’. Për efektivët të cilët rezultojnë pozitiv në përdorimin e substancave narkotike, përjashtohen menjëherë nga radhët e policisë, ndërsa në varësi të rastit nis edhe ndjekja penale.

Ky testim do të zhvillohet nëpërmjet caktimit të grupeve të përzgjedhura, të panjoftuara më parë dhe do të jetë periodik, e për rastet e dyshuara pavarësisht se në testimin e parë mund të rezultojnë negativ, testimi përsëritet brenda një periudhe të shkurtër.

Ndërkohë nuk ka një qëndrim zyrtar nëse do ti nështrohen testit të gjithë efektivët dhe kupola drejtuese. Fillimisht testet do të bëhen në të ardhmen në radhët e kandidatëve në Akademi më pas ndaj efektivëve në detyrë.

Testet që po praktikohen janë përmes urinimit si dhe marrjes së gjakut. Pothuajse 11 mijë efektivë policie në të gjithë vendin do t’i nënshtrohen këtij rregulli që duhet kujtuar se ka nisur të implementohet, pasi rregullorja dhe ligji e kishte të parashikuar por me vite më radhë nuk ishte implementuar.

Testimi do të jetë periodik dhe i përvitshëm, teksa Policia e Shtetit argumenton se një vendim i tillë është marrë për të ruajtur etikën, pastërtinë dhe imazhin e policisë.