Sport, Shqipëria zbret sot në fushë kundër Anglisë 

Kombëtarja shqiptare e futbollit do luajë mbrëmjen e sotme, takimin historik ndaj Anglisë. Në Ëembley kuqezinjtë kërkojnë që të marrin maksimumin ndonëse  e dinë se është tepër e vështirë, kjo për faktin se përballë kanë kombëtaren që pozicionohet në vendin e tretë në renditjen botërore. 63 vende i distancojnë me njëra-tjetrën, por shpesh herë fusha ka treguar se të tilla diferenca nuk janë aspak efektive.

Vlera e kombëtares së drejtuar nga Southgejt në treg sipas Transfermarkt është 1.21 miliardë euro, ku më i kushtueshmi është Harri Kejn i cili vlen më shumë se i gjithë grupi i kombëtares sonë, me 120 milionë euro vlerë në treg. Kuqezinjtë kanë një vlerë tregu prej 75 milionë euro.

Më i vlefshmi nën urdhrat e trajnerit Reja është mbrojtësi, Marash Kumbulla që gjithsesi kartoni i tij ka zbritur në 22 milionë euro pas paraqitjeve aspak të mira në kryeqytetin italian. Distanca të frikshme kur mendon cilësitë e  kombëtareve, megjithatë jo çdo herë vlera në treg është ajo e cila triumfon dhe arrin të marrë tre pikët. Një fitore e djemve tanë do ngjallte shpresat për një kualifikim në Botërorin e Katarit që mbahet vitin e ardhshëm.