I mori jetën kunatës në sy të nënës dhe vajzës, Gjykata e Apelit merr vendimin për Erdet Çapokun

Gjykata e Apelit ka vendosur të lërë në fuqi vendimin e Shkallës së parë për të dënuar me burgim të përjetshëm Erdet Çapokun.

Ai ndodhet në qeli për vrasjen e kunatës së tij Enkeleda Çapoku.

39-vjeçarja u masakrua me hanxhar e me levë hekuri nga kunati në prezencë të nënës dhe vajzës së saj.

Pas krimit të rëndë që ndodhi në Paskuqan, Policia shoqëroi për të marrë në pyetje të afërmit e viktimës dhe të autorit. Nga deklarimet që ata dhanë para oficerëve të Policisë, duket se krimi ishte paralajmëruar.

Madje, edhe bashkëshorti i Enkeledës, i cili ndodhet në burg, ishte i frikësuar se i vëllai mund t’u bënte keq gruas e vajzës.

Ai herë pas here i porosiste të afërmit që shkonin ta takonin në burg, që t’i ruanin nusen dhe vajzën nga 34-vjeçari.

Në bisedën e fundit që kishte bërë me autorin e dyshuar, kur ky i fundit ka shkuar ta takojë në burg për t’i dërguar fotografitë e Enkeledës, ai ishte frikësuar edhe më shumë.

Duke qenë se vetë e kishte të pamundur ta mbronte, Elton Çapoku i kishte thënë motrës dhe vëllait tjetër të tij që ta mbanin larg Erdetin nga Enkeleda.

Ndërsa u kishte kërkuar që të mos e lejonin të shkonte më në takim me të në burg, sepse nuk donte që të fliste më me të.

Sipas dëshmive që kanë dhënë vëllai e motra e autorit të dyshuar, kjo mund të jetë një nga arsyet pse Erdet Çapoku ishte acaruar edhe më shumë kohët e fundit, derisa arriti të vriste kunatën.

VENDIMI I GJYKATES

Siç është raportuar edhe në media të ndryshme, ngjarja e ndodhur në datën 09.01.2020 në vendin e quajtur, “Pallatet e vjetra”- Paskuqan, ku autori i krimit shtetasi me iniciale E.Ç, ka vrarë në banesën e saj, (kunatën e tij) shtetasen me iniciale E.Ç në prani të nënës dhe vajzës. Referuar interesimit të medias për këtë rast njoftojmë se:

Në Gjykatën e Rrethit Gjyqësor Tiranë, u zhvillua gjykimi për çështjen penale me të pandehur E.Ç, akuzuar për kryerjen e veprës penale të “Vrasja për shkak të marrëdhënieve familjare”, e parashikuar nga neni 79/c i K.Penal.

Lidhur sa më sipër, Gjykata e Rrethit Gjyqësor Tiranë me vendimin nr. 2306, datë 22.10.2020 ka vendosur:

-Deklarimin fajtor të të pandehurit E.Ç dhe dënimin e tij me burgim të përjetshëm.

-Çështja në apel u shqyrtua mbi bazën e ankimit të bërë nga i pandehuri me iniciale E.Ç, i cili kërkoi ndryshimin e vendimit penal për sa i përket masës së dënimit duke marë parasysh rrethanat lehtësuese të parashikuar në nenin 48 dhe 49 të K.Penal.

Në vijim, Gjykata e Apelit Tiranë me vendimin nr. 634 datë 23.11.2021 vendosi:

-Lënien në fuqi të vendimit nr. 2306 datë 22.10.2021 Të Gjykatës së Rrethit Gjyqësor Tiranë.