Një hetim i gjerë ka nisur tashmë nga SPAK në lidhje me aktivitetin e 13 kompanive “Call-Center” në Tiranë.
Ato dyshohet se kanë mashtruar një numër të madh qytetarësh të Bashkimit Europian me anë të premtimeve të rreme se nëse do të investonin në bursa, do të pasuroheshin.
Ndërkohë, mësohet se Prokuroria i ka kërkuar bankave të nivelit të dytë në Shqipëri që të mundësojnë transaksionet e kompanive në fjalë gjatë dy viteve të fundit për të bërë verifikimet përkatëse.
Ka të dhëna se bëhet fjalë për një mashtrim me vlerë dhjetra milion euro, të cilat qytetarët e vendeve të BE-së i kanë dërguar në llogaritë offshore të “Call Centera-ve” me bazë në Shqipëri duke besuar se po investonin ne bursa; forex apo në monedha virtuale.
Ky aktivitet është zgjeruar shumë gjatë viteve të fundit dhe mendohet që bëhet fjalë për mijera persona të mashtruar nga operatorët shqiptarë të “Call Center-ave”, të cilët i prezantoheshin si përfaqësues të kompanive të njohura të brokerimit me bazë në Itali apo gjetkë për të rritur besueshmërinë.
Pasi i “peshkonin”, operatorët e “Call Center-ave” iu kërkonin viktimave të tyre të rrisnin kapitalin e investimit me premtimin se kështu do të fitonin edhe më tepër para.
Fillimisht ishte Gjermania dhe Holanda ajo që shprehen shqetësim në lidhje me këtë praktikë, ndërkohë që ka të dhëna se “Call Center-at” e kanë ndjekur rrugë edhe me shtetas të vendeve të tjera si Italia; Anglia; Kanadaja, etj.
