Greqia nuk njeh certifikatat e vaksinimit të shqiptarëve, madje edhe ato të vaksinave Pfizer e Astra Zeneca. Dëshmitë tepër shqetësuese, jo vetëm nga shtetasit shqiptarë, por nga mjaft vizitorë të vendit nga shtete jo-anëtare të BE-së, kanë arritur tashmë tek autoritetet greke. Për çështjen është pozicionuar mbrëmë zyrtarisht zv/ministri i Qeverisjes Dixhitale, kompetent për Lehtësimin e Procedurave, Jorgos Jeorgantas.
Si duket se në Greqi njihen vetëm certifikatat e vaksinave të miratuara në BE, kështu që shtetasit shqiptarë me vaksinën kineze nuk konsiderohen të vaksinuar në shtetin grek.
Përpos kësaj, po brenda këtyre ditëve është zbuluar një rrjet certifikatash false nga Bullgaria, e konsideruar si një nga arsyet e fluksit të madh të të infektuarve.
Situata që u shkaktua nga certifikatat false të vaksinave si Pfizer e Moderna është tepër dramatike, kryesisht në Selanik e Greqinë Veriore, ku muajin e fundit rastet e evidentuara janë me qindra.
