Rama urdhëroi Çuçin/ Berisha nis ‘Foltoren’ në Kavajë: Nxori policë për të më bllokuar rrugën

Ish-kryeministri Sali Berisha ndodhet sot në Kavajë, ku po zhvillon takimin e rradhës në kuadër të lëvizjes së tij “Foltorja”.

Ai ka mbledhur simpatizantët demokratë të këtij qyteti.

Gjatë fjalës së tij, Berisha akuzoi ministrin e Brendshëm Bledi Çuçi se merr urdhra nga Edi Rama për ti bllokuar rrugën me policë. Ish-kryeministri tha se në 8 vite Edi Rama ka akumuluar më shumë pushtet se Ramiz Alia në vitin 1991.

“Në 8 vite Edi Rama ka shënuar çdo javë, çdo muaj nga një rekord të zi. Ka shtrirë përdhe këtë vend, ka shtrirë përdhe emrin e mirë të shqiptarëve. Shqipëria është bërë simbol i rekordeve më të zeza në Evropë edhe botë. Ai ia doli me megavjedhjen të varfërojë shqiptarët në mënyrë të paimagjinueshme. Sot ju merrni për shkak të bllokimit të rrogave, rritjes se çmimeve, 30 për qind më pak se në vitin 2013.  Varfëria ekstreme, mjerimi, janë rritur me 4 herë. Kancelari i ri i Gjermanisë porosit veturën 500 mijë euro. Kreu i Meduzës u paraqit në mandatin e tretë në zyrë me veturë 520 mijë euro. Shpenzon në çdo udhëtim të paktën 150-300 mijë euro. Sihariqi i madh i mandatit të tretë ishte kriza energjitike, të cilën e krijoi vetë, me duart e tij”, tha Berisha.

“Në 31 korrik digat e Kaskadës ishin plot e për plot, në kuotat maksimale, kurse ai me ndrikull grykësinë shitën tek firmat e veta energji, rezerva strategjike të vendit me 40-50 euro, ndërkohë që në treg shitej me 130 euro. Zbarazën me shpejtësi kaskadën për një muaj, ditë e natë duke vjedhur. Tani blejnë energji me 250 euro kilovatin. Vazhdon me klientelën mafioze, porte, aeroporte, koncesione, si e si tua nxijë të ardhmen të rinjve, si e si ti largojë nga Shqipëria. Në këto 8 vite Edi Rama mbylli dyert e Evropës për Shqipërinë. Ky është i vetmi kryeministër në Evropë dhe botë që emëron ministër trafikantin, deputetin e parë me skaf Saimir Shullazin. Pasi u kap në flagrancë se bashkëpunonte me grupin Habilaj, Rama dhe mafia e George Sorosit e dërgoi Tahirin në sallën ovale. Tani pasi mori erë çdo gjë ka emëruar skuthin e familjes, Çuçin e familjes, dhe e urdhëron, nuk merret me grupet kriminale por merret me kundërshtarët politikë dhe nxjerr policë rrugës për të më bllokuar rrugën. Qafën do thyejnë të gjithë këta. Në 8 vite Rama ka akumuluar pushtet në duart e tij 10 për qind më shumë se Ramiz Alia në vitin 1991”, vijoi ish-kryeministri.