Nga pista e hakmarrjes te konflikti me një subjekt të OFL, detaje nga vrasja e vëllait të ish-anëtarit të “Bandës së Fierit”

Detaje të reja dalin në dritë lidhur me krimin e rëndë që tronditi mbrëmjen e kaluar Fierin, ku u vra një 57-vjeçar. Demir Backa u qëllua për vdekje nga një automjet në lëvizje.

Mësohet se në makinën e djegur në vendin e quajtur Daullas në Bay-pass e cila ishte e tipit ‘C Class’ me portobagazh policia ka arritur të gjejë 2 armë zjarri që dyshohet se janë përdorur për krimin, një kallashnikov dhe një pistoletë, të cilat janë çuar në laborator për ekzaminim. Ndërkohë, në vendngjarje janë sekuestruar 16 gëzhoja.

Nga hetimet dyshohet se atentati mafioz është kryer për hakmarrje. Policia është përqendruar ne te kaluarën e Demir Backës dhe rezulton se para disa muajsh ai ka prishur ekuilibrat dhe ka pasur një konflikt me një person me influence në Fier, i cili ishte subjekt i OFL.

Nga kamerat e sigurisë ka rezultuar se në atentat kanë marrë pjesë dy persona. Përmendim se viktima është vëllai i ish-anëtarit të bandës së Fierit, Medi Backës, i cili është vrarë në 1997-ën.