Marrëveshja Kosovë-Serbi/ Pas “çlirimit” të kufijve, nga sot nis zbatimi i pikës së dytë

Zbatimi i pikës 2 në marrëveshjen mes Kosovës dhe Serbisë të arritur pas reciprocitetit për targat, do të fillojë duke u nisur nga sot.

Kjo do të thotë zbatim i përkohshëm i sistemit të afishave me të cilat si Kosova ashtu edhe Seria do të mbulojnë elementët shtetërorë të targave të njëra-tjetrës.

Gjithashtu pika e tretë parashikon që më 21 tetor një ekip i përbërë nga zyrtarë të BE, Kosovës dhe Serbisë do të nisë punën për të gjetur një zgjidhje të përhershmë për këtë situatë.

Kujtojmë se pikat kufitare Jarinjë dhe Bërnjakë, të cilat lidhin Kosovën me Serbinë, që nga e shtuna janë liruar, pas largimit të barrikadave të vendosura nga serbët dhe largimit të Njësisë Speciale të Policisë së Kosovës.

Këto dy pika kufitare ishin bllokuar me kamionë me zhavorr nga serbët lokalë, në shenjë proteste për reciprocitetin për targat e Serbisë të vendosur nga Qeveria e Kosovës më 20 shtator 2021.

Pas më shumë se 13 ditë bllokade këto dy pika kufitare u liruan, pas marrëveshjes së arritur në Bruksel në mes palës kosovare dhe asaj serbe.