“Jam më krenar seç isha para zgjedhjeve”, Rama flet edhe për patronazhistët 

Ambasadori i Bashkimit Evropian në Shqipëri Luigi Soreca paraditen e sotme ndodhej në kryeministri për të prezantuar progres-raportin e KE për integrimin. Në konferencën për mediat, duke cituar raportin, kryeministri u pyet nga gazetarët rreth patronazhistëve.

Kreu i qeverisë, ashtu sikurse ka bërë edhe herë të tjera, u shpreh se nuk ka parti politike në botë që nuk ka patronazhistë. Gjithashtu, Rama tha se është më krenar seç ishte për ta përpara zgjedhjeve.

Sipas kreut të qeverisë, patronazhimi është infrastrukturë e një partie që hyn në garë për t’i fituar zgjedhjet.

“Jam më krenar seç isha para zgjedhjeve. Pa ta nuk do të ishim një makineri e pathyeshme po do të ishim një foltore.”

Duke u kthyer tek raporti i KE-së, kryeministri Rama deklaroi se flitet për pretendime që po hetohen dhe duhet pritur që këto hetime të shkojnë deri në fund.

“Nuk ka pasur asnjë problem me asnjë të dhënë personale… Karta jonë është targë, s’ka brenda asgjë, një numër që nuk do të thotë asgjë nga pikëpamja e të dhënave personale sensitive…nuk janë të vlefshme nuk kanë asnjë lloj peshe nuk duhen në punën e patronazhistëve.”