INSTAT: Konsumi final i popullatës gati 10 % më i lartë

Konsumi final i popullatës, i cili përbën peshën kryesore të shpenzimeve në ekonomi, u rrit në tremujorin e dytë të vitit 2021, krahasuar me të njëjtën periudhë të vitit të mëparshëm.

Të dhënat zyrtare të Institutit të Statistikave (INSTAT) tregojnë se konsumi i popullatës është rritur me 9,83 %, duke shënuar rritje për të tretin tremujor radhazi, ndërsa ky tregues shënoi ritmin e rritjes më të lartë që nga tremujori i dytë i vitit 2016 kur konsumi final i popullatës u rrit me 4.61%.

Konsumi final i familjeve llogarit të gjitha mallrat dhe shërbimet që përdoren direkt për të plotësuar kërkesat individuale të familjeve rezidente.

INSTAT raportoi se, konsumi final i popullatës pësoi rritje me 8,45% edhe krahasuar me tremujorin e parë të vitit.

Rritja ekonomike për tremujorin e dytë të vitit 2021 rezulton të jetë 17,89 %, ndërsa edhe investimet e huaja janë rritur gjatë gjysmës së pare të vitit, duke arritur nivelin e 463 milionë eurove.

Rritja e këtyre dy treguesve, konsumit dhe investimeve që janë gjeneratorët kryesorë të rritjes ekonomike reflektojnë edhe rritjen e besimit në ekonominë shqiptare, falë reformave që u ndërmorën në vite dhe konsolidimit të duhur fiskal. /ATSH/