LIGJET E BIZNESIT
Situata duket se është normalizuar në Krujë pas fluksit prej shumë ditësh në spital si pasojë e helmimit nga uji. Në spital janë paraqitur vetëm 6 raste. Nuk ka asnjë qytetar të shtruar.
Pjesa më e madhe e qytetit është furnizuar me ujë mbrëmjen e kaluar dhe sot në mëngjes, por jo për t’u pirë. Institucionet e pushtetit vendor në Krujë janë në pritje të një përgjigje nga autoritetet për të dhënë urdhrin nëse uji duhet të pihet apo jo. Në një pjesë të qytetit vijon ndarja e ujit me autobotë ose qytetarët e blejnë në dyqan.
Njëri prej tyre u shpreh se në lagjen e tij bashkia nuk ka sjellë autobote. “E bleva për Zotin. 4 mijë lekë. Jemi të detyruar ta blejmë. Bashkia nuk ka sjellë autobote, harroje. Uji që erdhi në çezme, erdhi të paktën me larë rrobat, ishalla po pastrohet. Nuk shtyhet kështu. Jam vetë i gjashtë, uji duhet, kam shpenzuar” tha ai.
“Me ujin e pijshëm e kemi shumë keq, shumë problem. Nuk e di se cfarë do të bëhet. Na ka sjellë bashkia. Ujin për të pirë e kemi blerë” u shpreh një tjetër banor. Për situatën e krijuar, banorët e Krujës sot kanë lajmëruar protestë.
