Një ekip mjekësor ka mbërritur në Ministrinë e Kulturës, Rinisë dhe Sporteve në Kosovë, pasi dyshohet se regjisorja Burbuqe Berisha ka ndërruar jetë në vendin e saj të punës.

Sipas zëdhënësit të kësaj ministrie Osman Gashi, në vendngjarje ka shkuar dhe Mjekësia Ligjore.

“Janë ekipet e mjekësisë ligjore ne vendin e ngjarjes”, tha Gashi.

Berisha ka qenë edhe Drejtoreshë e Teatrit Kombëtar të Kosovës.

Për vdekjen e regjisores ka shkruar aktorja Shëngyl Ismaili.

Me anë të një postimi, aktorja ka thënë “Pusho e qete Buqe, shpirte i bardhe”.

Gjithashtu për humbjen e madhe të artit, ka reaguar dhe Ministria e Kulturës, Rinisë dhe Sporteve, objekt ku artistja ndërroi jetë.

Institucioni i ka shprehur ngushëllime familjes, miqve dhe gjithë komunitetit artistik.

“Me pikëllim ju njoftojmë se sot në mesditë në Ministrinë e Kulturës papritmas ka ndërruar jetë regjisorja e filmit dhe teatrit Burbuqe Berisha. Jemi thellësisht të prekur nga kjo ngjarje dhe u shprehim ngushëllime familjes, miqve dhe gjithë komunitetit artistik”, thuhet në njoftim.

Më tej është dhënë edhe një profil për jetën dhe veprimtarinë e saj.

“Burbuqe Berisha ishte regjisore e një numri të konsiderueshëm të filmave të shkurtër, të gjatë, dokumentarë, serive televizive, shfaqjeve teatrore dhe fituese e disa shpërblimeve në festivale të filmit dhe teatrit me karakter vendor e ndërkombëtar.

Berisha në vitin 2019 mori çmimin kombëtar për kinematografi.

Ajo ka punuar si menaxhere në Kino ABC në Prishtinë, si producente në Kosova Film, po ashtu ishte drejtoreshë e përgjithshme e Teatrit Kombëtar të Kosovës dhe anëtare e Këshillit Drejtues të QKK-së, si dhe të Ansamblit “Shota”.

Së fundi ishte pjesë e përgatitjes së regjisë për koncertin inaugurues të Operës së Kosovës”, thuhet në komunikatën e ministrisë.