“E kam të pamundur t’i gjej logjikën refuzimit të vaksinës”, Helena Kadare ka një mesazh për të rinjtë 

Shkrimtarja e njohur Helena Kadare ka përcjellë një mesazh për të gjithë të rinjtë lidhur  me vaksinimin kundër koronavirusit.

Ministrja e Shëndetësisë, Ogerta Manastirliu ka ndarë mesazhin e shkrimtares, e cila thotë se gjithmonë për çdo çështje dhe nismë ka qenë në krahë të studnetëve, teksa thekson se këtë herë ndryshojnë gjërat.

“Tërë jetën time kam qenë në krah të mendimit të të rinjve, dhe kur ai ka qenë ekstravagant apo në kundershtim me logjikën “e pastër”. Sepse sido që të jetë ai, mendimi i rinisë, në të gjitha rastet është më i përparuari, është i lirë, i hapur, kurajoz. Për herë të parë në jetën time të gjatë, gjithmonë pro tyre, mendimi im po bie ndesh me ta.

Është vaksina kundër covidit që na ndan. Ne, të rriturit, i shpëtuam kësaj murtaje në sajë të vaksinës. Por, në një bilanc të shkurtër, çfare na duhet neve jeta pa nipërit e mbesat tona? Sepse tani vala po godet ata. E kam të pamundur t’i gjej logjikën refuzimit të vaksinës prej tyre. Është njesoj si t’i thuash Jetës jo, në favor të mosqenies! Kaq e thjeshtë”, thuhet në mesazhin e saj.