E frikshme, stuhia në Itali përmbyt spitalin, shtëpi e rrugë

Stuhia që gjunjëzoi Catania-n në Itali shkaktoi përmbytjen e spitalit “Nesima Garibaldi”.

Uji ka mundur të depërtojë në pavijone dhe dhoma dhe pacientët brenda po përjetojnë momente paniku.

Stuhia po ashtu ka lënë pasoja të rënda për qytetin. Rrugët e tjera u përmbytën ndërsa Via Etnea u kthye në një lumë të vërtetë.

Uji në qytet vinte edhe nga fshatrat e afërta të Etna-s ndërsa qendra historike mbeti në errësirë pas ndërprerjes së energjisë elektrike. Ndërkohë, mësohet se si pasojë e përmbytjeve ka humbur jetën të paktën një person. Dyqanet janë mbyllur për shkak të përmbytjeve të orëve të fundit ndërsa kryebashkiaku Salvo Pogliese ka apeluar qytetarët që të mos dalin nga shtëpitë.

“I bëj thirrje të gjithë popullatës që të mos largohen nga shtëpitë e tyre përveç për arsye emergjente, sepse rrugët janë të pushtuara nga uji”.

Ky është apeli i shkruar në rrjete sociale nga kryetari i bashkisë së Katanias Salvo Pogliese. Gjithashtu u dha urdhër për mbylljen e menjëhershme “të objekteve tregtare me përjashtim të farmacive, atyre të ushqimit dhe nevojave bazë”.