A do të ketë rritje pagash për policët? Çuçi befason me përgjigjen

Ministri i Brendshëm Bledi Çuçi foli ditën e sotme për pagat e policëve. Çuçi dha lajmin e mirë për rritjen e rrogave për punonjësit e policisë.

“Ne gjithmonë e kemi pasur në vëmendje trajtimin sa më të mirë të punonjësve të policisë së shtetit nga pikëpamja financiare. Policia e shtetit ka qenë sektori që ka përfituar më së shumti nga rritja e pagave, kjo nuk do të thotë se nuk do ta shikojmë, jemi duke menduar edhe për këtë gjë. Ne kemi një projekt që do të krijojë mundësi për policinë për të marrë të ardhura nga shërbimet, për të shpërblyer vetë trupën e saj, po i shikojmë këto mekanizma pa e cenuar buxhetin e shtetit. Po i shkojmë këto mekanizma” tha ai.

E ndërsa afati 100 ditor që  kryeministri Edi Rama la për reformimin e Policisë së Shtetit, ministri shpjegoi se drejtori Gledis Nano do të ketë një tur në të gjithë vendin për të parë situatën dhe më pas do të bëjë edhe raportin mbi gjendjen.

“Drejtori i ri e ka filluar punën edhe me këtë analizë. Ai do të jetë në të gjithë Shqipërinë dhe pa diskutim ky raport do të shërbejë edhe si një dokument për vlerësimin e gjithsekujt për të vazhduar, është një punë e vazhdueshme dhe jo një veprim i shkëputur në mënyrë që të kemi një trupë profesionale që policia e shtetit të jetë në lartësinë e duhur. Edhe ministri do të jetë një raport përmbledhës për këtë gjë” përfundoi ai.