“Turp të vijë, merr urdhëra si ushtare” Basha i sulet Nikollës, merr deputetët dhe ikën nga seanca

Pas debatit që zhvilloi me Taulant Ballën, kryedemokrati Lulzim Basha ka braktisur sallën e Kuvendit.

Ai kërkoi që të mos votoheshin sot drejtuesit e Komisioneve, ndërsa Basha ndërhyri në atë moment dhe u nxeh.

Lideri opozitar u ngrit në këmbë dhe akuzoi kryetaren e parlamentit Lindita Nikolla se merr urdhëra nga Partia Socialiste dhe vepron si ushtare.

“E ke nisur seancën plenare duke shkelur rregulloren. Ke miratuar rendin e ditës dhe merr urdhra si ushtare nga dikush që s’duhet të ishte në këtë sallë. Je një manikinë që merr urdhra nga dikush që nuk duhet të ishte këtu, duhet të ishte në burg. Me çfarë pushteti e miraton rendin e ditës. Kështu është kur vendos drejtuese një si ty. Turp të vijë,”- tha Basha dhe doli nga salla.

Pas tij iku edhe deputeti Ervin Salianji e Agron Gjekmarkaj. Nuk bëri përjashtim as Sali Berisha, i cili pavarësisht se zyrtarisht është përjashtuar, veproi si anëtar i grupit parlamentar të PD-së. Ai u ngrit në këmbë, mbërtheu xhaketën dhe iku nga salla pas Bashës.