Talebanët zhdukin gazetaret në Kabul, vetëm 100 vazhdojnë punën

Më pak se 100 gazetare femra janë ende duke punuar në radiot apo dhe televizionet private në Kabul, në krahasim me rreth 700 që ishin vitin e kaluar. Shifrat publikohen në një raport të Reporterëve pa Kufij (RSF).

Nga 510 gratë që punuan për tetë nga mediat më të mëdha dhe grupet e shtypit, vetëm 76 janë ende në punë – nga të cilat 39 prej tyre janë gazetare. Referuar raportit, tanimë  “gratë gazetare janë në procesin e zhdukjes”.

Në një konferencë shtypi një javë më parë, zëdhënësi i talebanëve Zabiullah Mujahid u shpreh se gratë nuk duhet të shkojnë në punë për sigurinë e tyre. Ai pranoi se masa ishte e nevojshme pasi ushtarët talebanë “nuk janë të trajnuar si të sillen me gratë”.

Në paraqitjen e tij të parë në një konferencë para dy javës, Mujahid tha se talebanët “duan që të gjitha mediat të jenë të lira, të pavarura, të vazhdojnë botimet … brenda kornizës së Islamit.”

Ai gjithashtu tha se nuk do të ketë “asnjë dhunë kundër grave” në Afganistan dhe siguroi anëtarët e komunitetit ndërkombëtar se ata “nuk duhet të shqetësohen” për këtë çështje.