Sali Berisha para memorialit të Azem Hajdarit: Të përmbysim regjimin e pazareve. Një poshtërim i padëgjuar ka ndodhur dhe…

Ish-kryeministri Sali Berisha ka zhvilluar sot në mbrëmje homazhe në bustin e Azem Hajdarit, ndërsa kreu i PD Basha i zhvilloi ato paradite.

Berisha kishte edhe një mesazh për të gjithë demokratët, ndërsa u zotua se do ta ngrenë në piedestal PD.

“Shqipëria ndodhet në gjendjen më kritike të saj, në fakt po kështu edhe Partia Demokratike. Ndaj është në nderin dhe detyrën e demokratëve, kudo në Shqipëri, që të ngrihen, të ngrenë kokën lart. Trashëgimia e tyre e shkëlqyer u jep nder dhe frymëzim në cdo kohë.

Një poshtërim i pa dëgjuar dhe paparë ndonjëherë në historinë e partisë së lirisë ka ndodhur dhe jam i sigurt se anëtarët, mbështetësit, drejtuesit e të gjitha niveleve të PD, do të dinë të hedhin në koshin e plehrave, vendimin antistatutor, antiligjor, antidemokratik, të atij që sot është në krye të PD, por që dëshmon se mbi këtë tokë ka vetëm një interes, interesin e tij personal.

Merreni këtu, këtë prani sot, si zotim para tribunit legjender, që ne, PD do ta ngremë në piedestalin që e meriton, që demokratët dhe demokratet nuk ka forcë në botë që ti mposhtë ata. Do ngrihen dhe do ecin të sigurt, më të bashkuar se kurrë, për të përmbysur regjimin e drogës, të vjedhjes dhe të pazareve”, tha Berisha.

Të pranishëm ishin mbështetës të Sali Berishës, por edhe djali i Azem Hajdarit.