Një ditë pas ngjarjes në Shkodër, ku dy vëllezër mbetën të plagosur, policia ka arrestuar autorin e dyshuar.
Ai është identifikuar si shtetasi Xhevahir Fikaj, 47 vjeç.
Sipas uniformave blu autori ka rënë në pranga sot në mëngjes, teksa dje plagosi dy vëllezërit ad Gruda 34 vjeç dhe Ilir Gruda 41 vjeç.
Mësohet se i gjithë konflikti ka nisur për motive pronësie.
NJOFTIMI ZYRTAR I POLICISE
Kapet autori i dyshuar i plagosjes së ndodhur ditën e djeshme në Fshatin e Ri, Rrethinat ,Shkodër.
Shërbimet e Komisariatit të Policisë Shkodër dhe strukturat hetimore të DVP Shkodër, falë reagimit në kohë, veprimeve të shpejta dhe profesionale, krehjes së zonës bazuar dhe në informacionet e marra në rrugë operative, u bë e mundur që në orët e para të mëngjesit të sotëm të kapej dhe ndalohej shtetasi Xhevahir Fikaj., 47 vjeç.
Ky shtetas dyshohet si autorë i plagosjes me armë zjarri të shtetasit I.G, si dhe i plagosjes me sende të forta të shtetasit L.G (vëllezër) pas një konflikti për motive pronësie.
Materialet i kaluan Prokurorisë pranë Gjykatës së Shkallës së Parë Shkodër, për veprime të mëtejshme.
NGJARJA
Sipas burimeve, fillimisht është goditur nga katër persona shtetasi Xhevahir Fikaj, mes të cilëve edhe dy vëllezërit Gruda dhe më pas i është kundërpërgjigjur duke dëmtuar me sende të forta njërin prej tyre, si dhe duke plagosur me armë zjarri vëllain e tij.
Po sipas burimeve policore, vëllezërit Gruda kanë pasur një tokë të zënë forcërisht ndaj një personi që e kishte marrë me ligjin 7501. Atë tokë vëllezërit Gruda dyshohet se ia kanë shitur një tjetër personi pa dokumentacion.
Duke qenë se e ka pasur afër shtëpisë, Xhevahir Fikaj ka shfaqur interes për të blerë tokën në fjalë. Për këtë arsye, ai ka rënë dakord me personin që ua kishte blerë vëllezërve Gruda, si dhe me personin tjetër që ka pasur certifikatën e pronësisë.
Po ashtu, dyshohet se autori Fikaj ka biseduar edhe me familjen Gruda, të cilët fillimisht i kanë thënë se nuk kanë ndonjë pretendim. Pasi ka bërë rrethimin konflikti ka lindur përsëri sepse vëllezërit Gruda dyshohet se i kanë thënë autorit të plagosjes se nuk e kanë shitur tërësisht atë sipërfaqe toke, por një pjesë të saj. Pavarësisht pretendimeve që kanë të dy palët, Policia vijon hetimet për ta zbardhur të plotë ngjarjen, si dhe për të kapur autorin e dyshuar të plagosjes Xhevahir Fikaj.
