Për herë të parë pasi dogji mandatet, Partia Demokratike do të rikthehet nesër në Kuvend.
Kanë kaluar 30 muaj që nga ky vendim i shumëkomentuar nga opinioni publik asokohe dhe jo vetëm.
Ndërkohë mësohet se një orë para seancës së parë parlamentare për këtë sesion të ri, që do të nisë në orën 10:00 këtë të premte, PD ka lajmëruar se do të zhvillojë mbledhjen e grupit parlamentar.
Ende nuk ka asnjë njoftim nëse do të komunikohet ndonjë qendrim për Sali Berishën.
Kujtojmë se deri më tani Lulzim Basha nuk ka folur publikisht për qëndrimin që do të mbajë PD ndaj Sali Berishës, duke lënë në fuqi, deklaratën që vetë Berisha ka zbuluar për gazetarët, se kreu i PD, i ka kërkuar ambasadores Kim, prova për shpalljen e Berishës non grata.
Çështjet që Partia Demokratike pritet t’i ketë me prioritet për të diskutuar me PS, dhe mbi të gjitha të gjejë konsensus janë ndryshimet kushtetuese, reforma zgjedhore dhe territoriale, pasi sipas opozitës, këto 3 çështje kanë pasur ndikimin e tyre në humbjen e zgjedhjeve.
