LIGJET E BIZNESIT
Ditën e sotme kryeministri Edi Rama mori pjesë në homazhet e zhvilluara për nder të nënkomisarit Saimir Hoxha, i cili u vra në krye të detyrës.
Nga Pallati i Kongreseve, kreu i qeverisë tha se ky është një moment i rëndë për të gjithë.
“Padyshim që është një çast i rëndë për të gjitha forcat tona të policisë dhe për shoqërinë. Por mbi të gjitha për familjen. Jam për të shprehur ngushëllimet vëllazërore familjes dhe të gjithë kolegëve që e kanë njohur nga afër këtë dëshmor të ri të atdheut.
Dua t’ju bëj me dije se qeveria sot ka vendosur mbështetje financiare të konsiderueshme për familjen. Me të hyrë në fuqi ligji për fëmijët nën kujdesin e republikës, fëmijët e të ndjerit do të marrin 170% të pagës së tij deri kur të arrijnë në moshën e pjekurisë.
Nuk ka mbështetje që kompenson zbrazëtinë për familjen por përgjegjësia jonë është që fëmijët e dëshmorëve të mos mbeten vetëm por të ndihen deri në fund të përkrahur për të hyrë në rrugën e jetës së tyre, duke qenë krenar jo vetëm për prindin por edhe shtetin”, tha Rama gjatë fjalës së tij.
