Ajo është një nga politikanet më të njohura socialiste.
Bëhet fjalë për Mimi Kodhelin, e cila së fundmi ka komentuar sezonin e ri parlamentar që pritet të nisë dhe emrat e zgjedhur nga kryeministri Edi Rama për kabinetin qeveritar të katër viteve të ardhshme.
Kodheli shpreson që ky sezon parlamentar të jetë më pozitiv, ndërsa kërkon që për çështjet madhore të ketë bashkëpunim mes qeverisë dhe opozitës. Kodheli u shpreh në emisionin ‘Breaking’ se “ditën që ne do të bashkëpunojmë për gjërat madhore, ajo do jetë dita që do meritojmë hapjen e negociatave”.
“Presim të fillojë sezoni i ri parlamentar. Shpresoj të jetë një nisje e mbarë. Ditën që ne do të bashkëpunojmë për gjërat madhore, ajo do jetë dita që do meritojmë hapjen e negociatave. Nuk kemi ditur ta bëjmë. Ne kemi dhënë mesazhe dhe sinjale bashkëpunimi, përmes kryeministrit”, tha Kodheli.
Gjithashtu Kodheli deklaroi se nuk është surprizuar nga emrat e qeverisë së re, ndërsa nuk e fshehu gëzimin për zgjedhjen e Lindita Nikollës kryeparlamentare.
“Pati emra që ju surprizuan? Jo domosdoshmërish për mua. Janë kolegë, me të cilët punojmë dhe rrimë bashkë. Shumica ishin rikonfirmime. U gëzova pa masë për zonjën Nikolla. Është një kolegë dhe mike e mirë. Besoj se një zonjë në krye të parlamentit e zbut gjuhën”, tha Kodheli.
Dominimi i grave në qeveri, tha Kodheli, është pasur me komente seksiste dhe kjo nuk e nderon vendin.
