Lejoi kandidaten për deputete të bënte fushatë brenda ambienteve mësimore, drejtori i shkollës e pëson keq

Drejtori i shkollës së mesme “Shën Meri” në Kukës është gjobitur me shumën 5 mijë lekë nga KQZ. Ai akuzohet se ka shkelur Kodin Zgjedhor duke lejuar një aktivitet elektoral brenda ambienteve mësimore.

Pas denoncimit që bëri organizata “Qëndresa Qytetare”, Ilirjan Celibashi gjatë mbledhjes së kësaj të marte vendosi dënimin me gjobë për drejtorin, pasi lejoi aktivitetin politik brenda oborrit të shkollës të Gerta Durakut, kandidate në zgjedhjet e 25 prillit, aktualisht deputete e Partisë Socialiste.

Kryekomisioneri tha se drejtori i shkollës e pranoi se aktivitetet partiake ishin zhvilluar brenda oborrit të institucionit arsimor që ai drejton.

“Në lidhje me ankimin pr aktivitetin e kandidates së zonja Gerta Duraku, rezultoi i provuar pretendimi, sipas të cilit është zhvilluar në ambientet e shkollës Shën Mëri Kukës. Në zbatim të Kodit Zgjedhor, ky aktivitet është i ndaluar, edhe vetë drejtori i shkollës e pranoi faktin se aktiviteti është zhvilluar në territorin e shkollës. Kqz merr masën dënim me gjobë për drejtorin e shkollës Shën Mëri me vlerë 5 mijë lekë”, u shpreh Celibashi.