Kush do jetë në qeverinë e re? Rama mbledh sot Asamblenë Kombëtare

Kryeministri Edi Rama do të mbledh ditën e sotme Asamblenë Kombëtare ku pritet të zbulojë emrat e kabinetit të ri qeveritar.

Mbledhja nis në orën 10:00 dhe do të zhvillohet te Pallati i Kongreseve.

Deri tani, Rama ka konfirmuar se pjesë e kabinetit do të jenë Elisa Spiropali dhe Taulant Balla, ndërsa ka kritikuar punën e bërë nga Ministria e Turizmit kundrejt menaxhimit të mbetjeve urbane përgjatë sezonit turistik, si dhe ministria e Arsimit, që sipas Ramës, nuk kanë plotësuar pritshmëritë, duke vënë në pikëpyetje fatin e ministrave përkatës në qeveri.

Nga ana tjetër, Rama në mbledhjen e fundit që zhvilloi me ministrat vlerësoi në mënyrë të veçantë ministren e Shëndetësisë, Ogerta Manastirliu, për menaxhimin e suksesshëm të pandemisë, si dhe ministren e Infrastrukturës dhe Energjitikës, Belinda Balluku, të cilat me shumë gjasa pritet të rikonfirmohen në kabinetin e ri.