Kujt do t’i bënte atentat? Policia arreston të riun me dy granata

Policia e Tiranës ka parandaluar një ngjarje të mundshme kriminale. Një i ri nga Pogradeci qarkullonte si pasagjer në një automjet me dy granata me vete. Nga Policia bëjnë me dije se në pranga ra dhe drejtuesi i automjetit për veprën penale “Moskallëzim krimi”.

Njoftimi i Policë: 

“Sherbimet e Komisariatit të Policisë Nr. 2, në vijim të punës për rritjen e parametrave të sigurisë, si rezultat i kontrolleve të shtuara për kapjen e personave që qarkullojnë me sende të kundraligjshme me vete, bazuar dhe në informacionet e marra në rrugë operative, në vendin e quajtur “Pallati me Shigjeta” kanë ndaluar për kontroll mjetin tip “Volksëagen Golf” me drejtues shtetasin F. Z dhe pasagjer K. H.

Gjatë kontrollit të ushtruar në mjet, poshtë sediljes së pasagjerit ku ndodhej shtetasi K. H, sherbimet e Policisë gjetën dhe sekuestruan dy granata dore.

Në përfundim të veprimeve, specialistët bënë arrestimin në flagrancë për veprën penale “Mbajtja pa leje dhe prodhimi i armëve shpërthyese dhe municionit” të shtetasit K. H., 27 vjeç, banues në Pogradec dhe për veprën penale “Moskallëzim i krimit” shtetasin F. Z., 44 vjeç, banues në Pogradec”.