Ishte nisur në udhëtim me të fejuarin, vlogerja zhduket në mënyrë misterioze

Autoritetet në SHBA po kërkojnë një vajzë të re nga Florida.

Ajo është zhdukur gjatë një udhëtimi me të fejuarin e saj.

E reja njihej nga disa njerëz për shkak të videove vlog që publikonte në Youtube, së basku me partnerin.

Çifti e kishte dokumentuar udhëtimin e tyre të fundit në mediat sociale.

Gabrielle “Gabby” Petito, 22 vjeçe, nuk ka folur me familjen e saj që nga fundi i gushtit, kur ishte duke vizituar Parkun Kombëtar Grand Teton të Wyoming me partnerin. Policia thotë se i dashuri, Brian Laundrie, 23 vjeç, i cili është kthyer në shtëpi, tani është një nga personat e dyshuar për zhdukjen.

Laundrie u kthye në shtëpinë e tyre në Florida më 1 shtator, thotë policia. 10 ditë më vonë prindërit e Petito raportuan se ajo ishte zhdukur. Laundrie refuzon të flasë me policinë për zhdukjen e saj.

“Ne po i lutemi kujtdo, përfshirë Brian, që të ndajë informacione me ne për vendndodhjen e saj në javët e fundit,” tha shefi i policisë, Todd Garrison. “Mungesa e informacionit nga Brian po pengon këtë hetim. Përgjigjet përfundimisht do të dalin.”

Nga ana tjetër, avokati i Laundrie, Steve Bertolino, mbrojti heshtjen e tij.

“Në përvojën time, partnerët intim janë shpesh personi i parë ku zbatimi i ligjit përqendron vëmendjen e tyre në raste të tilla dhe paralajmërimi se ‘çdo deklaratë e bërë do të përdoret kundër jush’ është i vërtetë, pavarësisht nëse klienti im kishte ndonjë lidhje me znj. Petito. Si i tillë, me këshillën e këshilltarit Laundrie nuk po flet për këtë çështje,” tha Bertolino.

Familja e Petito i ka bërë thirrje Laundrie që të japë përgjigje, përfshirë kur e ka parë për herë të fundit dhe “pse e la Gabby-n vetëm dhe e çoi furgonin e saj në Florida”.

Çifti u nis në një udhëtim mbarëkombëtar me një furgon të bardhë Ford Transit në korrik, duke postuar përditësime në mediat sociale. Ata e filmuan veten duke buzëqeshur, puthur dhe vrapuar në plazhe në një video në YouTube, që është parë mbi 1 milion herë.

Dy javë para se Petito të zhdukej, më 12 gusht, policia në qytetin jugor të Jutas, Moab, u thirr për një incident të mundshëm të dhunës në familje që përfshinte çiftin. Policia publikoi pamjet e kamerës së trupit, të cilat tregonin Petito-n duke qarë dhe duke u ankuar për gjendjen e saj psikologjike tek oficerët. Ajo gjithashtu tha se çifti po grindeshin shpesh. Oficerët rekomanduan që ata të kalonin natën të ndarë, por nuk ngritën asnjë akuzë. Ende nuk dihet se çfarë ndodhi më pas.

Policia tani ka kapur furgonin dhe po e shqyrton atë për të gjetur të dhëna.