Gjithçka e shkrumbuar, vetëm shtëpia e pensionistëve i shpëton llavës së frikshme

Një ngjarje tepër e pazakontë është shënuar në ishujt Kanarie, ku vullkani i “Cumbre Vieja” vijon të nxjerrë llavë e tym prej disa ditësh. Teksa llava e fuqishme shkrumboi pothuajse çdo gjë që i doli para në La Palma, një shtëpi pensionistësh ka mbetur tërësisht e paprekur dhe i ka shpëtuar mrekullisht flakëve.

Lajmi u bë viral në rrjete sociale, ndërkohë që nëpër komente njerëzit shprehen mjaft të habitur teksa e cilësojnë si një rast të çuditshëm.

Vetë pronarët e shtëpisë, një çift pensionistësh nuk gjenden në ishull, por janë të befasuar që shtëpia e tyre nuk është rrënuar.

Nga ana tjetër një sërë fshatrash përreth vullkanit u evakuan dhe për fat të mirë nuk pati viktima, por vetëm dëme të shumta materiale. Ishujt Kanarie ndodhen rreth 100 kilometra larg bregut perëndimor të Afrikës, teksa La Palma është ishulli më veriperëndimor i arkipelagut. Autoritetet  ishin në gjendje gatishmërie pasi mijëra dridhje toke qenë raportuar që një javë më parë.