Berisha bën thirrjen: Të shpëtojmë PD-n nga pazaret e fëlliqura të Bashës e Ramës

Ditën e sotme pritet që ish-kryeministri Sali Berisha të zhvillojë takimin e radhës me demokratët, në atë që ai e quan “Foltorja”, nismë kjo e tij për të larguar Lulzim Bashën nga kreu i Partisë Demokratike.

Mbledhja pritet të mbahet në orën 18:00. Së fundmi, ai ka postuar një video, ku në sfond dëgjohet  kënga e zgjedhur, e njëjta që shoqëroi Partinë Demokratike e kryesuar nga Lulzim Basha gjatë fushatës para zgjedhjeve të 25 prillit, “Unstoppable”, e kënduar nga Sia.

“Nis beteja jonë për shpëtimin e Partise Demokratike dhe të Shqipërisë nga pazaret e flliqura të Lulzim Bashës dhe Edi Ramës” shkruhet në videon e publikuar nga ish-kryeministri.

Përmendim faktin se Berisha u shpall non-grata nga SHBA me akuzat e korrupsionit masiv dhe pengimit të drejtësisë, ai u përjashtua nga grupi parlamentar i PD-së, ndërsa tani po tenton rimarrjen e partisë duke larguar Bashën.