Një lajm jo fort i mirë për Granit Xhakën dhe për Zvicrën në këto ndeshje të rëndësishme të këtij shtatori.
Mesfushori shqiptar, kapiteni i helvetëve, ka rezultuar pozitiv me virusin covid-19, por përgjigja për testin e tij erdhi vetëm pak momente para se skuadra të zbriste në fushë kundër Greqisë.
“Xhaka kishte simptoma në mëngjes, teksa u izolua menjëherë në dhomën e tij. Një test i shpejtë doli negativ, ndërsa më pas testi PCR, që u krye për efekt sigurie, prodhoi një rezultat pozitiv gjatë pasdites. Ai do të zhvillojë një tjetër test PCR gjatë të enjtes. Mjeku përgjegjës në kantonin e Bazelit nuk ka urdhëruar masa të tjera për skuadrën pasi lojtarët ose janë të vaksinuar, ose kanë kaluar COVID-19. Një pjesëtar i stafit u desh të niste karantinën”, bën me dije Federata Zvicerane e Futbollit.
Me siguri, Xhaka do të humbasë edhe ndeshjet kualifikuese ndaj Italisë dhe Irlandës.
