U kthyen nga Siria/ 5 gratë do të merren në pyetje, ja për çfarë do hetohet

Në ditët e ardhshme Prokuroria e Posaçme Anti-Korrupsion pritet të marrë në pyetje 5 gratë që u riatdhesuan në Shqipëri nga kampet e ISIS në Siri.

Sipas raportimeve mësohet se marrja në pyetje do të bëhet nga prokurorët e SPAK në qendrën e posaçme në Durrës, ku ata janë akomoduar.

Gratë e riatdhesuara janë Brunilda Koçollari; Emanuela Vladi; Ruzhdije Balliu; Lavdie Kaca dhe Klotilda Zani.

Përmes marrjes në pyetje SPAK do të verifikojë udhëtimin e tyre nga Shqipëria në drejtim të Sirisë. Gjithashtu do kërkohet informacion për rekrutuesit, financuesit dhe personat që i kanë ndihmuar ato të kalojnë nga Shqipëria në Turqi me destinacion final Sirinë.

Një tjetër çështje me rëndësi për hetimin, i cili ka nisur vite më parë nga ish-Prokuroria për Krimet e Rënda, ka të bëjë me faktin se kush i rekrutoi dhe financoi shqiptarët që shkuan për të luftuar për ISIS në Siri.

Pesë gratë dhe 14 fëmijët u riatdhesuan të dielën e kaluar, ndërsa nga deklarimet zyrtare do të zhvillohet edhe një operacion tjetër për të rikthyer në Shqipëri personat që kanë mbetur në kampet e ISIS.