“Përdor helikopterin e ushtrisë për udhëtimet e tij” Shqipëria e pushtuar nga zjarret, Basha akuza Ramës

Kryetari i Partisë Demokratike Lulzim Basha ka akuzuar drejtpërsëdrejti kryeministrin Edi Rama për keqmenaxhimin e situatës nga zjarret në Shqipëri.

Ai shton se Rama e ka përdorur helikopterin e ushtrisë për udhëtime private, duke ia hequr kështu sipas tij  autoriteteve që duhet ta përdornin në luftën kundër zjarreve.

REAGIMI I PLOTE:

Mirënjohje për punonjësit e emergjencave civile dhe forcat e ushtrisë që po përballen me flakët përgjatë këtyre orëve të vështira. Pamjet që i shfaqin teksa luftojnë me mjete rrethanore janë sa pikëlluese po aq sa indinjuese kur shohim se në të njëjtën ditë, Edi Rama, i heq përballjes me zjarrin helikopterin e ushtrisë, për ta përdorur për udhëtimet e tij.

Natyrisht, kërcënimi i zjarrit është i kudondodhur në rajon, por nuk ndodh askund që në një moment krize, mjetet e pakta të mpaken edhe më shumë për t’i shtuar privilegjet një individi. Kjo nuk është papërgjegjshmëri, por modeli me të cilin është keqqeverisur dhe varfëruar vendi. Prandaj nuk ka fonde dhe mjete për t’u përballur me emergjencat, qofshin zjarre apo tërmete, sepse shteti përdoret si instrument i një pakice që punon për vete, jo për qytetarët.