“Keni vrarë njerëz të pafajshëm”/ Zhduket poeti që kritikoi talebanët

Një poet i ri i quajtur Mehran Popal, nga Herati, i cili u mor nga talebanët më 14 gusht vazhdon të jetë i zhdukur dhe askush nuk di asgjë në lidhje me vendodhjen e tij.

Maroof, vëllai i poetit të zhdukur, tha se të shtunën e kaluar talebanët e arrestuan Popalin në shtëpinë e tij në Herat.

“Ne nuk dimë asgjë për të dhe nuk e dimë se ku është dërguar që nga ajo ditë”, shtoi ai.

Sipas vëllait të tij, talebanët e arrestuan poetin e ri në lidhje me kritikat dhe komentet e gjata në rrjetin social Facebook.

“Ju keni vrarë njerëz të pafajshëm me shumicë dhe keni derdhur shumë gjak padrejtësisht për të ardhur në pushtet”, thuhet në një postim të Mehran Popal.