Ishte e shqetësuar për pamjen e saj, parukierja ndërron jetë gjatë operacionit plastik

Një parukiere ka ndërruar jetë pas komplikimeve të shumta që shfaqi gjatë një operacioni plastik. Louise Smith, 37 vjeç, shkoi në Iran për të kryer operacionin e saj, pasi ishte tejet e shqetësuar për pamjen e jashtme.

Mësohet se Smith jetonte në Dubai. Ajo dëshironte të ndryshonte mënyrën se si dukej, pasi gjatë izolimit si pasojë e pandemisë kishte shtuar shumë kilogramë.

“The Sun” bën me dije se Louise nuk arriti të dilte shëndoshë e mirë nga ky operacion dhe ndërroi jetë në datën 28 korrik. Motra e Louise, Sharon Elston, 51 vjeç, tha: “Ne të gjithë kemi përjetuar një shok të madh.”

Pasi për 19 vite punoi në Mbretërinë e Bashkuar, Louise u zhvendos në Lindjen e Mesme në vitin 2019 për një jetë më të mirë pas përfundimit të një lidhjeje.

Irani është një vend i cili njihet për kirurgji kozmetike me çmim shumë të ulët. Në vitin 2019, u raportua se rreth 150,000 operacione të hundës kryheshin atje çdo vit, ndërkohë që në Mbretërinë e Bashkuar realizoheshin vetëm 2,000.