Facebook ndalon të gjitha postimet që mbështesin talebanët

Pushtimi i Afganistanit nga talebanët duket se paraqet një sfidë dhe për kompanitë e mëdha të rrjeteve sociale në trajtimin e përmbajtjes, pasi shumë shtete i konsiderojnë si terroristë.

Lidhur me këtë, rrjeti social Facebook konfirmoi të hënën se ka ndaluar talebanët dhe çdo përmbajtje që e mbështet ata nga platformat e tij, raporton Reuters.

Për vite me radhë, talebanët kanë përdorur mediat sociale për të përhapur mesazhet e tyre.

Facebook theksoi se politika zbatohet për të gjitha platformat e saj, përfshirë rrjetin e saj kryesor të mediave sociale, Instagram dhe WhatsApp.

Platformat rivale të mediave sociale janë vënë gjithashtu nën vëzhgim se si ata trajtojnë përmbajtje të lidhura me talebanët.

Zëdhënësit kanë përdorur Twitter për të azhurnuar qindra mijëra ndjekësit e tyre, pasi organizata rimori kontrollin mbi Afganistanin.