Tragjedi në Vlorë! 39-vjeçari tenton të masakrojë me hanxhar të vëllanë 

Një ngjarje tragjike është shënuar në Vlorë. Një 39-vjeçar ka përfunduar në prangat e policisë pasi ka tentuar të vrasë me hanxhar vëllain e tij. Bëhet me dije se i arrestuari, e kishte dhunuar më herët të vëllain. Ende nuk dihen shkaqet e kësaj ngjarje të rëndë.

“Policia e Vlorës parandalon një ngjarje kriminale në familje, ndërhyrja në kohë dhe me profesionalizëm e shërbimeve të Policisë parandaloi përshkallëzimin e mëtejshëm të ngjarjes.

Kanosi me mjet prerës vëllanë e tij, vihet në pranga 39-vjeçari. Sekuestrohet një mjet prerës (hanxhar).

Shërbimet e Komisariatit të Policisë Vlorë, pas njoftimit se në lagjen “24 Maji”, në ambientet e banesës, shtetasi G. M. kishte ushtruar dhunë fizike dhe po kanoste me mjet prerës (hanxhar) vëllanë e tij, menjëherë kanë shkuar në adresën e dhënë, duke parandaluar përshkallëzimin e mëtejshëm të dhunës dhe ngjarjen e mundshme. Punonjësit e Policisë së Patrullës së Përgjithshme kanë bërë të mundur neutralizimin dhe prangosjen e shtetasit G. M., në banesë.

Në përfundim të veprimeve, nga specialistët për Hetimin e Krimeve në Komisariatin e Policisë Vlorë u bë arrestimi në flagrancë i shtetasit G. M., 39 vjeç, banues në Vlorë.

Materialet procedurale i kaluan Prokurorisë pranë Gjykatës së Shkallës së Parë Vlorë, për veprën penale “Dhuna në familje”, thuhet në njoftimin e policisë.