“Të ulen në gjunjë dhe të kërkojnë falje” Kushtetuesja pezullon vendimin për Teatrin, flet Neritan Liçaj

Pas vendimit të sotëm të Gjykatës Kushtetuese e cila rrëzoi ligjin special që kalon Teatrin Kombëtar në pronësi të Bashkisë së Tiranës duke pezulluar dhe ndërtimin e Teatrit të ri, ka reaguar dhe aktori i njohur Neritan Liçaj.

Ky i fundit u shpreh se vendimi i sotëm është një fitore e madhe.

Artisti kërkoi ndër të tjera që pushtetarët të cilët kanë gisht në këtë çështje të ulen në gjunjë dhe të kërkojnë falje.

“Jam i emocionuar është një fitore e madhe. E rëndësishme është Teatri dhe më vjen mirë që jam në këtë projekt. Në fund fare, koha dhe historia na dha të drejtë në këtë betejë. Si kjo nuk ka parë bota. E kanë pjellë gjithë këtë baltë mbi ne sepse u sulmuam politikisht”, tha ai.

Më tej, aktori shtoi se qeveria duhet të kërkojë falje dhe të ndërtojë një teatër ashtu siç ishte.

“Na sulmuan politikisht dhe gaboi qeveria me mazhorancën e majtë. Nderi dhe dinjiteti është të ulen në gjunjë dhe ta bëjnë siç ishte. Le të bëjnë teatro të tjerë. E pakta që mund të bëjnë është të ulen në gjunjë dhe të kërkojnë falje, jo për Neritanin”, tha ai.