SPAK, Arben Kraja bën paralajmërimin e bujshëm: Shumë shpejt rezultate në luftën kundër zyrtarëve të korruptuar

Kreu i Prokurorisë së Posaçme, SPAK, Arben Kraja gjatë fjalës së mbajtur në konferencën “Sfidat dhe mundësitë në luftën kundër korrupsionit”, ka bërë një paralajmërim të fortë. Sipas tij, do të ketë rezultate konkrete të SPAK sa i përket ndëshkimit të zyrtarëve të korruptuar.

“Na është kërkuar që të përqendrojnë punën tonë për hetimet për zyrtarët e lartë në përdorimin e fondeve në mënyrë abuzive. Kjo është një përparësi e jona dhe e vlerësojmë çdo ditë, besoj se shumë shpjet do të kemi rezultate dhe do ta bëjmë prezent në ditët në vijim, struktura është vendosur dhe besoj se do të kemi rezultate. Jemi të bindur se po bëjmë më të mirën për vendin tonë, që të ikë imazhi keq, ai imazh se biznesi i huaj këtu te ne nuk mund të investojë se krimi i organizuar të vendos gjoba dhe ti nuk gjen të drejtën, apo se ka korrupsion dhe nuk gjen hapësira”, tha Kraja.

Po ashtu, në fjalën e tij, ai theksoi se ka pasur rezultate në luftën kundër krimit të organizuar që kanë përfunduar dhe me sekuestrim të pasurive të paluajtshme të vendosur në mënyrë të paligjshme.

“Vendimet e gjykatave janë të shkallës së parë, jemi të vendosur për të bllokuar çdo lloj pasurie kriminale, kushdo që e zotëron atë, sepse është e paligjshme dhe nuk mund ta disponojnë atë”, theksoi Kraja.