Revolta në aeroport/ 16 makina policie për të qetësuar shqiptarët

250 pasagjerë, përfshirë këtu shumë fëmijë e të moshuar, pritën rreth 24 orë për të marrë avionin në aeroportin e Hamburgut në fillim të muajit korrik.

Mediat gjermane shkruajnë se pasagjerët zbuluan se avioni i tyre drejt Tiranes kishte pësuar defekt teknik dhe se fluturimi do të shtyhej për ditën tjetër. Vendimin për këtë situatë e kishte marrë Autoriteti kundër Zhurmave.

Një ditë më vonë edhe avioni që mbërriti nga Tirana ishte me shumë vonesë, dhe nuk u lejua të fluturonte natën.

Vonesat me orare të zgjatura ngjallën pakënaqësi të shumta tek udhëtarët që nisën të ngrenë zërin e të ankohen. Tepër të revoltuar, ata thanë se për shkak të këtyre zvarritjeve, veç të tjerave  do t’u duhej të përsërisnin dhe testin e koronavirusit, afati i të cilit skadonte. Punonjësit e sigurisë së aeroportit thirrën për ndihmë policinë e Hamburgut. Kjo e fundit dërgoi atje plot 16 makina.

Pas negociatash të tejzgjatura, avioni u nis në fluturim orët e para të mëngjesit të 6 korrikut. Ngjarja ka shkaktuar debate të shumta si për sa i takon sigurisë në aeroporte, ashtu edhe për ndalimin e bërë fluturimeve gjatë natës.